- Haloaaaaaaa,
Hopi di nos ta pensa ku no tin regla ora ta trata sèks. Nos ta kere ku e ta simplemente laga lòs, disfrutá, eksitá i yega na un orgasmo, pero mester tin regla. Regla nan ta importante pa tene e sèks safe emoshonalmente tambe. Aparte di regla nan ku nos mes a inventá manera “feita promé” of juist “laga un repi kabei”, “sòru pa e kos ei ta bon labá” i sobrá kosnan, tin 7 regla basiko ku tur hende mester tene nan mes na dje ora ta trata sèks. E 7 reglanan aki ta konsentimentu, komunikashon, kreatividat, karísia, tene kuenta ku otro, rèspèt mutuo & hasi bon uzo di bo oreanan i bo wowonan!
Pero awe mi ta bai papia di e promé regla kual ta: KONSENTIMENTU!
Poko dia pasá mi a presentá boso un senario i puntra kiko boso lo hasi den e kaso aki. Hopi hende a kontestá A, kual mi ta haña hopi great, pero aki aya tambe mi a mira B of C komo kontesta. Den mi inbox tambe tabatin hopi persona ku a kontestá B of C kual a lagami un tiki preokupá.
Ta sumamente importante pa tur dos ó 3 ó un grupo di persona konsentí pa tene relashon seksual ku otro. Konsentimentu aparentemente no ta nifiká e meskos pa tur hende, pues aki un splikashon pa yuda boso tene kuenta ku boundries di otro.
1. Libertat
Bo pareha seksual mester tin e libertat pa bisa si òf nò sin NINGUN preshon òf manipulashon i sigur sin wòrdu fòrsá.
2. Reversibel
Bo pareha (nan) seksual tin e derechi di kambia di desishon òf pensamentu. Si! Asta mei mei di un akto seksual.
3. Informá
Tur persona mester sa adelantá kiko nan ta konsentí na dje!
4. Entusiasmo
Tur persona mester ta eksitá pa i interesá den e akto seksual. Si esaki no ta e kaso, STÒP! (akinan regla nr 7 ta importante. Hasi bon uzo di bo oreanan i bo wowonan)
5. Spesífiko
Si siman pasá el a lagabo penetrá anal, no ta nifiká ku awe e ke! Pues ser spesífiko ku bo pareha seksual i komuniká (regla nr 2) e loke ku bo ke òf tin gana di dje pa e por duna su konsentimentu!
Pues e loke mi ke pa ta duidelijk ta ku na momentu ku un hende bisa bo pa stòp. STÒP!
Dikon?
Stop di hasi ko’i kens!
Ta bo mes di bo ke...
Ai hasi gewoon no?!
Asina aki bo ke lagami anto?
Ta kon ta hasi baha e kos aki awo?
Konvensé un hende pa hasi loke el a bisa ku e no ke hasi, ta manipulashon i/òf preshon.
“Entrada hudisial” sin konsentimentu = Abuzu seksual.
Laga nos ban tene kuenta ku esaki. Skucha bo pareha seksual, paga tinu riba su body language. Si e no bisabo ku su boka, su idioma di kurpa lo lagabo sa ku e no ta sinti’é komfortabel i ku en realidat e no ke hasi nada. Evitá doló di kabes, respetá otro pa boso tur dos por tin un bida seksual plasentero!
Reactie plaatsen
Reacties