- Haloaaaa,
Awe mi tei bèk despues di par di dia ku un topiko un poko mas serio, kual ta abuzu seksual. Hopi di nos, tantu muhé komo hòmber a yega di pasa den e situashon horendo aki anto hopi biaha nos no tabata sa òf sa kiko pa hasi despues di pasa den esaki.
Promé ku mi siguí, mi ke pa boso sa esaki. Loke bo a pasa aden, NO TA BO FALTA! No ta importá ki paña bo tabatin bistí, kon bo a komportá, si na promé instante bo tabata ke tene relashon seksual i despues ba kambia idea. NÒ TA KEDA NÒ den tur sirkunstansia i/òf situashon ku presentá! Tur emoshon ku ta pasa den bo kurpa na e momentu ei i/òf kisas awor aki mes ta valido i mi ke bo sa ku ami si tei pabo!
Bueno, na momentu ku bo pasa den abuzu seksual, bo por hasi hopi kos pero ta importante pa bo sa ku bo no ta obligá pa hasi nada.
Sa ku bo por semper tuma kontakto ku polis na momentu ku esaki kaba di pasa i nan mes lo guiabo den e proseso, pero si bo no ke hasi esaki mesora, e ora ei e stap nan akibou lo yudabo den e proseso;
[ ] Promé kos i kisas esun di mas importante ta pa bo bai dòkter of spoedeisende hulp. Muy probablemente lo bo tin e hansha pa baña bo kurpa, paso bo ta sintibo fís, pero mi ta konsehábo-maske kon difisíl esaki por ta- pa por fabor laganan kolektá tur evidensia nesesario for di bo kurpa pa si bo disidí na hasi aangifte mesora òf despues di tempu. E evidensia kolektá lo keda wardá te na momentu ku bo disidí i ta kla pa hasi bo aangifte na polis;
[ ] Bai bo kas òf kaminda bo ta sintibo safe i grita, sapatiá, yora i para kuantu ku bo ke bou di awa;
[ ] Si bo disidí na hasi un aangifte warda tur otro tipo di evidensia ku bo tin p.e. paña, panty, boxer etc ku bo tabatin bistí e dia ei (no laba esakinan) òf mensahe nan entre abo i e persona si aki ta trata di un persona ku bo konose;
[ ] Por fabor buska yudansa na un persona di konfiansa, slachtofferhulp òf kualke instansiá ku ta trata tipo di kasonan asina aki p.e. slachtofferhulp.nl;
[ ] Mi ta komprondé ku por ta difisíl pa papia ku un amigu i/òf familiar tokante di algu asina aki paso hopi biaha e loke ku nan kontestá por lagabo sintibo pihó (maske hopi biaha esaki no ta bin ku mal intenshon). Pues, mi ta konsehá bo pidi yudansa di un psycholoog i lag'é guiabo den bo healingprocess.
Lo ta great si boso share e topiko aki paso bo no sa nunka ken mester di esaki!
Reactie plaatsen
Reacties